2009-cu il YANVARIN 1-dən QÜVVƏYƏ MİNƏN QANUNLAR - 1 Января 2009

Bu gündən Azərbaycan iqtisadiyyatında bəzi yeniliklərin tətbiqinə başlanılır. Yanvarın 1-dən gömrük sistemində vahid pəncərə sistemi tətbiq edilir. Bundan sonra sahibkarlar sərhədi keçərkən sənədləri rəsmiləşdirmək üçün müxtəlif instansiyalara deyil, yalnız gömrük orqanlarına müraciət etməli olacaq. Əvvəllər qeydiyyat zamanı azi 2-3 saat vaxt itirən sahibkarlar bir neçə dəqiqəyə gömrük prosedurunu başa çatdıracaq.
Bu ildən pensiya sığorta sistemi haqında 2009-2015-ci illəri əhatə edən dövlət proqramının icrasına başlanılır. Proqramda əhalinin pensiya təminatının yaxşılaşdırılması, pensiya-sığorta siteminin təkmilləşdirilməsi tədbirləri əksini tapıb.
Pensiyalar hesablanarkən 2006-ci ilin yanvarın 1-ə qədər olan dövr üçün məbləğin hesablanmasında son 2 ilin əmək haqqının əsas götürülməsi prinsipi də ləğv edilir. Əvəzinə pensiyalar bundan sonra əmək stajı əsas götürülməklə hesablanacaq.
Bu gündən Azərbaycanda ünvanlı sosial yardım üçün ehtiyac meyarının həddi 55 manatdan 60 manata qaldırılır.

Yeni ilin ilk günündən genişzolaqlı internet şəbəkəsinə qoşulma tarifləri 30 faiz aşağı salınır. Bu son istifadəçilər üçün internet tariflərinin 15-20 faiz aşağı düşməsi deməkdir.

Bu gündən kənd təsərrüfati məhsulları istehsalçıları növbəti 5 il müddətinə torpaq vergisi istisna olmaqla bütün vergilərdən azad olunur. Sığorta şirkətləri isə qarşıdakı 3 ildə mənfəət vergisi ödəməyəcək.

Bu il yanvarın 1-dən 2011-ci ilin sonuna qədər Azərbaycan da daxil olmaqla bir neçə ölkə Avropa Birliyi dövlətlərinə malları güzəştli şərtlərlə ixrac edəcək. /ANS TV/