“İntel” korporasiyasının Direktorlar Şurasının sədri Kreyq Barrett iyunun əvvəlində Bakıya səfər edəcəkdir.
O, Bakıda keçiriləcək görüşlər və aparılacaq danışıqlar çərçivəsində ali və orta təhsil sahəsində informasiya texnologiyalarının inkişaf perspektivlərini açıqlayacaq, elmin, iqtisadiyyatın uğurlarında və beynəlxalq aləmdə rəqabət qabiliyyətinin artırılmasında informasiya texnologiyalarının rolunu izah edəcəkdir.
Səfər çərçivəsində müzakirə ediləcək əsas mövzularından biri də Azərbaycanda “Mobil texnologiyaları məktəblərə” proqramının həyata keçirilməsinin davam etdirilməsi məsələsi olacaqdır. Bu proqrama görə, “İntel” texnologiyaları bazasında şagirdlər üçün hazırlanan fərdi mobil kompyuterlərin məktəblərə təmənnasız verilməsi nəzərdə tutulur.
Azərbaycanın bütün 18 dövlət ali məktəbində internet şəbəkəsindən naqilsiz istifadə zonaları yaradılmasını nəzərdə tutan layihənin həyata keçirilməsi “İntel” korporasiyası ilə respublikamızın ali məktəblərinin sıx qarşılıqlı əlaqələrinə nümunədir. Bakı Dövlət Universitetində və Azərbaycan Dövlət İqtisad Universitetində bu ali məktəblərin tələbələrinin mobil fərdi kompyuterlər üçün “İntel®Centrino” texnologiyası əsasında noutbukların köməyi ilə internet şəbəkəsindən pulsuz istifadə edə bilmələri üçün hot-spotlar fəaliyyətdədir.
Bakıda “İntel” korporasiyası, Təhsil Nazirliyi, Rabitə və İnformasiya Texnologiyaları Nazirliyi arasında Niyyət Sazişi imzalanacaqdır. Bu Sazişə əsasən, həmin proqramın həyata keçirilməsi ilə yanaşı, müəllimlərin təxminən 40 faizi təhsil prosesində rəqəmsal texnologiyaların tətbiq edilməsinin innovasiya metodlarını öyrənəcəkdir. Naqilsiz internet texnologiyalarının inkişafına şərait yaradan layihələrə xüsusi diqqət yetirmək nəzərdə tutulur. Bundan əlavə, “İntel” korporasiyası respublikada hərtərəfli informasiya və texniki dəstək formatında dövlət təhsil proqramının həyata keçirilməsinə və kompyuterləşdirmə səviyyəsinin artırılmasına kömək edəcəkdir.
BAKI. 02.06.2008. AzərTAc.
|